ພຊສ ແຂວງວຽງຈັນ ສຳເລັດກອງປະຊຸມດຳເນີນຊີວິດການເມືອງປັບປຸງປົວແປງພັກ ພິມ
ຂຽນໂດຍ ພອນໄຊ ເດດທະວົງ   
ມື້ອັງຄານທີ່ 08 ສິງຫາ 2017 ເວລາ 10: 23

ປະຕິບັດຕາມທິດຊີ້ນຳຂອງອົງຄະນະພັກ ແຂວງວຽງຈັນ, ໃນຄັ້ງວັນທີ 24-28 ກໍລະກົດ 2017 ຜ່ານມາ, ພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງວຽງຈັນ ໄດ້ເປີດບັ້ນດໍາເນີນຊີວິດການເມືອງປັບປຸງປົວແປງພັກຂື້ນ ຢູ່ທີ່ຫ້ອງປະຊຸມສູນວັດທະນະທໍາ ແຂວງວຽງຈັນ, ໂດຍໃຫ້ກຽດເຂົ້າຮ່ວມເປັນປະທານຂອງ ສະຫາຍ ວິນັດ ສີສຸວົງ ຄະນະປະຈໍາພັກແຂວງ, ປະທານກວດກາພັກ, ຫົວໜ້າພະແນກກວດກາລັດ ແຂວງວຽງຈັນ, ມີສະຫາຍ ກອງຄໍາ ອິນໄພຍາລາດ, ກໍາມະການພັກແຂວງ, ເລຂາຄະນະພັກຮາກຖານ, ຫົວໜ້າພະແນກ ຊສ ແຂວງວຽງຈັນ ພ້ອມດ້ວຍຄະນະພັກຮາກຖານ, ບັນດາເລຂາໜ່ວຍພັກ, ສະມາຊິກພັກສົມບູນ ແລະ ສໍາຮອງຂອງພະແນກ ຊສ ເຂົ້າຮ່ວມທັງໝົດ 65 ສະຫາຍ, ຍິງ 17 ສະຫາຍ.


 

ໃນປະຈຸບັນ ຄະນະພັກຮາກຖານ ພຊສ ແຂວງວຽງຈັນ ປະກອບມີ 3 ໜ່ວຍພັກ, ມີສະມາຊິກພັກທັງໝົດ 66 ສະຫາຍ, ຍິງ 17 ສະຫາຍ, ລົງກໍ່ສ້າງຮາກຖານການເມືອງ 1 ສະຫາຍ. ຈຸດປະສົງຂອງການດໍາເນີນຊີວິດການເມືອງຄັ້ງນີ້ແມ່ນເພື່ອເປັນການສຳຫຼວດກວດກາ ຕີລາຄາຄືນດ້ານດີ, ດ້ານອ່ອນ, ຂໍ້ຄົງຄ້າງ ແລະ ວິທີການແກ້ໄຂຕໍ່ບັນຫາທີ່ຍັງຄ້າງຄາກ່ຽວກັບການຊີ້ນຳໆພາຂອງຄະນະພັກ ແລະ ພະນັກງານຫຼັກແຫຼ່ງພາຍໃນ ພຊສ ແຂວງວຽງຈັນ ໃນໄລຍະ 1 ປີ ຜ່ານມາ. ກອງປະຊຸມໄດ້ຮັບຟັງການເຊື່ອມຊືມເອກະສານ “ເດັດດ່ຽວປັບປຸງປົວແປງພັກໃຫ້ປອດໃສ, ເຂັ້ມແຂງ ແລະ ໜັກແໜ້ນ”, ຮັບຟັງການຜ່ານບົດສະຫຼຸບການຊີ້ນໍາໆພາຂອງຄະນະພັກພະແນກໃນໄລຍະ 1 ປີຜ່ານມາ ແລະ ການຜ່ານບົດສໍາຫຼວດຕົນເອງຂອງຄະນະພັກຮາກຖານ. ຫຼັງຈາກນັນ, ກໍ່ໄດ້ມີການແບ່ງໜ່ວຍເພື່ອຜ່ານບົດສຳຫຼວດ ແລະ ປະ ກອບຄຳເຫັນ ເພື່ອຕຳນິສົ່ງຂ່າວ ກໍ່ສ້າງເຊິ່ງກັນ ແລະ ກັນ ພ້ອມທັງໄດ້ມີການທາບທາມຢັ່ງຫາງສຽງຄວາມໄວ້ວາງໃຈຕໍ່ຄະນະພັກຮາກຖານ, ຄະນະໜ່ວຍພັກທີ່ຂຶ້ນກັບຄະນະພັກຮາກຖານ ແລະ ບັນດາສະຫາຍສະມາຊິກພັກພາຍໃນ ພຊສ ທັງໝົດ. ຈາກຜົນຂອງການທາບທາມ ແລະ ລົງຄະແນນສຽງແບບປິດລັບ, ບັນດາສະຫາຍສະມາຊິກພັກທີ່ໄດ້ຈັດຢູ່ໃນປະເພດແຂງມີ 22 ສະຫາຍ, ຍິງ 3 ສະຫາຍ, ປະເພດກາງມີ 39 ສະຫາຍ, ຍິງ 11 ສະຫາຍ, ບໍ່ໄດ້ຈັດປະເພດມີ 4 ສະຫາຍ (ສະມາຊິກສຳຮອງ), ຍິງ 3 ສະຫາຍ.

ການດຳເນີນຊີວິດການເມືອງປັບປຸງປົວແປງພັກຢູ່ ພຊສ ແຂວງວຽງຈັນຄັ້ງນີ້ ໄດ້ດຳສຳເລັດລົງໃນວັນທີ 28 ກໍລະກົດ 2017 ເຊິ່ງໃນຕອນທ້າຍຂອງບັ້ນດຳເນີນ ສະຫາຍ ວິນັດ ສີສຸວົງ ປະທານກອງປະຊຸມກໍ່ໄດ້ມີຄຳເຫັນໂອ້ລົມຕໍ່ກອງປະຊຸມ ໂດຍເໜັ້ນໜັກໃຫ້ບັນດາຄະນະພັກ, ພະນັກງານຫຼັກແຫຼ່ງ ແລະ ສະຫາຍສະມາຊິກພັກທັງໝົດພາຍໃນ ພຊສ ຈົ່ງໄດ້ນຳເນື້ອໃນການຕຳນິສົ່ງຂ່າວຄັ້ງນີ້ ໄປພິຈາລະນາປັບປຸງແບບແຜນການຊີ້ນຳໆພາຢູ່ໃນແຕ່ລະວຽກງານຂອງຕົນໃຫ້ດີຂື້ນ, ຕ້ອງເດັດດ່ຽວ ແລະ ຕັດສິນໃຈສູງ ເພື່ອບັບປຸງຕົນເອງ, ປັບປຸງໜ່ວຍພັກໃຫ້ມີຄວາມເຂັ້ມແຂງຮອບດ້ານໃນຕໍ່ໜ້າ.