ກອງປະຊຸມ ສະຫຼຸບວຽກງານຮອບດ້ານ ຂອງ ໜ່ວຍຊາວໜຸ່ມ ກອງເລຂາ ຄມຊ ປະຈຳປີ 2016 ແລະ ທິດທາງແຜນການ ປີ 2017

 ໜ່ວຍຊາວໜຸ່ມ ກອງເລຂາຄະນະກໍາມະການແມ່ນໍ້າຂອງແຫ່ງຊາດລາວ ມີສະມາຊິກທັງໝົດ 34 ສະຫາຍ, (ຍິງ 15 ສະຫາຍ),ເປັນສະມາຊິກກໍາມະບານ 31 ສະຫາຍ (ຍິງ 15 ສະຫາຍ),ເປັນສະຫະພັນແມ່ຍິງ 15 ສະຫາຍ, ເປັນສະມາຊິກພັກ ສົມບູນ 5 ສະຫາຍ (ຍິງ 2 ສະຫາຍ), ເປັນສະມາຊິກພັກສໍາຮອງ 6 ສະຫາຍ (ຍິງ 2 ສະຫາຍ) ແລະ ສະມາຊິກຊາວໜຸ່ມ ທີ່ເປັນມະຫາຊົນກ້າວໜ້າທີ່ໄດ້ສະເໜີເຂົ້າຮຽນສະໜັບສະໜູນພັກ 4 ສະຫາຍ (ຍິງ 3 ສະຫາຍ); ຄະນະໜ່ວຍຊາວໜຸ່ມ ກຄມຊ ປະກອບມີ 5 ສະຫາຍ ໃນນັ້ນມີ ເລຂາ 1 ສະຫາຍ, ຮອງເລຂາ 1 ສະຫາຍ ທັງເປັນປະທານກວດກາ ແລະ ມີຄະນະ 3 ສະຫາຍເປັນກໍາມະການ; ໜ່ວຍຊາວໜຸ່ມ ກອງເລຂາຄະນະກໍາມະການແມ່ນໍ້າຂອງແຫ່ງຊາດລາວ ໄດ້ແບ່ງອອກເປັນ 4 ຈຸ ພ້ອມທັງໄດ້ແຕ່ງຕັ້ງ ຫົວໜ້າຈຸ ແລະ ຮອງຈຸ ຈໍານວນ 8 ສະຫາຍ ເຊັ່ນ: ຈຸທີ 1 ຮັບຜິດຊອບວຽກງານວິທະຍາສາດ ແລະ ວິຊາການ; ຈຸທີ 2 ຮັບຜິດຊອບວຽກງານ ກິລາ, ສິລະປະ ແລະ ວັນນະຄະດີ; ຈຸທີ 3 ຮັບຜິດຊອບວຽກໂຄສະນາ-ຂ່າວສານ, ຮ່ວມມື-ອອກແຮງງານ; ແລະ ຈຸທີ 4 ຮັບຜິດບໍລິຫານ-ການເງິນ. 

ກອງປະຊຸມໄດ້ ຜ່ານ ແລະ ຮັບຮອງເອົາບົດສະຫຼຸບຕີລາຄາການເຄື່ອນໄຫວນຳພາການຈັດຕັ້ງປະຕິບັດຂໍ້ແຂ່ງຂັນ 4 ບຸກຂອງໜ່ວຍ ຊາວໜຸ່ມ ກອງເລຂາຄະນະກໍາມະການແມ່ນໍ້າຂອງແຫ່ງຊາດລາວ ໃນສົກປີ 2015-2016  ແລະ ທິດທາງແຜນການສົກປີ 2016-2017, ເຊິ່ງບົດສະຫຼຸບ ດັ່ງກ່າວໄດ້ສະຫຼຸບຕີລາຄາ ແລະ ສ່ອງແສງເຖິງການເຄື່ອນໄຫວວຽກງານ ໃນແຕ່ລະດ້ານຂອງໜ່ວຍຊາວໜຸ່ມ ກອງເລຂາຄະນະກໍາມະການແມ່ນໍ້າຂອງແຫ່ງຊາດລາວ ໃນໄລຍະ ຜ່ານມາ ພ້ອມທັງຍົກໃຫ້ເຫັນ ດ້ານດີ,ດ້ານອ່ອນ ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ພ້ອມກັນນັ້ນ ກໍຍັງໄດ້ວາງທິດທາງ ແລະ ແຜນການ ໃນຕໍ່ໜ້າ; ຫຼັງຈາກນັ້ນ ສະຫາຍ ສີວັນນະກອນ ມາລີວັນ ຄະນະບໍລິຫານງານຊາວໜຸ່ມກະຊວງ  ກຊສ ກໍ່ໄດ້ເນັ້ນເຖິງບັນຫາວຽກງານ 4 ບຸກ ເຊັ່ນ: ບຸກທາງດ້ານແນວຄິດ,ບຸກທາງດ້ານວຽກງານຝຶກຝົນຫຼໍ່ຫຼອມຮ່ຳຮຽນ, ວຽກງານການຈັດຕັ້ງ ແລະ ບຸກທະລຸທາງດ້ານເສດຖະກິດ, ທ້າຍສຸດນັ້ນກໍ່ໄດ້ຮັບຄຳໂອ້ລົມ ແລະ ທິດເຍືອງທາງ ຈາກສະຫາຍ ຈັນທະວິໄຊ ອິນສີຊຽງໃໝ່ ຄະນະໜ່ວຍພັກ ກອງເລຂາ ຄມຊ ທັງເປັນ ຜູ່ຊີ້ນໍາວຽກງານສາມອົງການຈັດຕັ້ງ ຂອງ ກອງເລຂາຄະນະກໍາມະການແມ່ນໍ້າຂອງແຫ່ງຊາດລາວອີກດ້ວຍ.