ໃນຕອນເຊົ້າຂອງວັນທີ 26 ມິຖຸນາ 2020 ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ເປີດກອງປະຊຸມ ຄົບຄະນະບໍລິຫານງານພັກ ກະຊວງ ຄັ້ງທີ 10 (ເປີດກວ້າງ), ສະໄໝທີ I ໂດຍການເປັນປະທານຂອງສະຫາຍ ສົມມາດ ພົລເສນາ ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງ ຊັບພະຍາກອນ ທຳມະຊາດ ແລະ ສິ່ງແວດລ້ອມ, ມີບັນດາສະຫາຍ ຄະນະປະຈຳພັກ, ຄະນະພັກ ກະຊວງ, ເລຂາ, ຮອງເລຂາຄະນະພັກຮາກຖານ ແລະ ເລຂາ, ຮອງເລຂາໜ່ວຍພັກ ທີ່ຂຶ້ນກັບອົງຄະນະພັກ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ເຂົ້າຮ່ວມທັງໝົດ 33 ສະຫາຍ, ຍິງ 7 ສະຫາຍ.

ກອງປະຊຸມໃນຄັ້ງນີ້ແມ່ນໄດ້ຜ່ານເອກະສານໃນການຈັດຕັ້ງປະຕິບັດ ນຳສະເໜີລາຍງານເພື່ອໃຫ້ທີ່ປະຊຸມພິຈາລະນາຮັບຮອງ ແລະ ມີທິດຊີ້ນຳ ໃນການຈັດຕັ້ງປະຕິບັດ ຄື:

1. ເຜີຍແຜ່ດຳເນີນງານໃນການກະກຽມກອງປະຊຸມໃຫຍ່ຜູ້ແທນສະມາຊິກພັກ ຄັ້ງທີ II ຂອງອົງຄະນະພັກກະຊວງ;

2. ບັນດາຄະນະພັກຮາກຖານ ທີ່ມີການປັບປຸງ ແລະ ສ້າງຕັ້ງຂຶ້ນໃໝ່ ຕາມການປັບປຸງກົງຈັກການຈັດຕັ້ງ(5 ຄະນະພັກຮາກຖານ, 1 ໜ່ວຍພັກເອກະລາດ) ຈະໄດ້ນຳສະເໜີການວາງແຜນການກະກຽມດຳເນີນກອງປະຊຸມໃຫຍ່ຂອງຕົນ ເພື່ອໃຫ້ສຳເລັດຕາມແຜນການ;

3. ບັນດາໜ່ວຍພັກ ທີ່ສຳເລັດກອງປະຊຸມໃຫຍ່ ຄັ້ງທີ I ແລະ ທີ II ຈະໄດ້ນຳສະເໜີຜ່ານແຜນຂອງໜ່ວຍພັກ ແລະ ແຜນການຈັດຕັ້ງປະຕິບັດການເຄື່ອນໄຫວວຽກງານ ວິຊາສະເພາະ ປະຈຳປີ 2020 ຊຶ່ງແຜນນຳພາ ແລະ ແຜນການຈັດຕັ້ງປະຕິບັດດັ່ງກ່າວ ແມ່ນຜັນຂະຫຍາຍອອກມາຈາກ ແຜນການ 5 ປີ ໃນການນຳພາ ແລະ ຈັດຕັ້ງປະຕິບັດທີ່ຜ່ານການຮັບຮອງຈາກກອງປະຊຸມໃຫຍ່ມາແລ້ວ;

4. ອະນຸກຳມະການເນື້ອໃນ, ອະນຸກຳມະການບຸກຄະລາກອນ ແລະ ອະນຸກຳມະການຂະບວນການ, ເສດຖະກິດ, ປ້ອງກັນຊາດ-ປ້ອງກັນຄວາມສະຫງົບ ໃນການກະກຽມກອງປະຊຸມໃຫຍ່ ຄັ້ງທີ II ຂອງອົງຄະນະພັກກະຊວງ ຈະໄດ້ນຳສະເໜີໂຄງສ້າງຮ່າງບົດລາຍງານການເມືອງ, ໂຄງສ້າງບົດສຳຫຼວດການນຳພາລວມ ຂອງອົງຄະນະພັກກະຊວງ ສະໄໝທີ I ແລະ ໂຄງສ້າງຮ່າງບົດແຜນພັດທະນາຂະແໜງຊັບພະຍາກອນທຳມະຊາດ ແລະ ສິ່ງແວດລ້ອມ ຕໍ່ທີ່ປະຊຸມ ພິຈາລະນາຮັບຮອງ.

ຈາກນັ້ນທີ່ປະຊຸມກໍ່ໄດ້ມີການປະກອບຄຳຄິດຄຳເຫັນໃສ່ຮ່າງເອກະສານດັ່ງກ່າວ ໂດຍສະເພາະແມ່ນ ການກະກຽມ ແລະ ດຳເນີນກອງປະຊຸມໃຫຍ່ຂອງບັນດາໜ່ວຍພັກ, ຄະນະພັກຮາກຖານ ທີ່ມີກົງຈັກການຈັດຕັ້ງໂຮມກັນເພື່ອໃຫ້ດຳເນີນ ແລະ ສຳເລັດຕາມແຜນການ, ທັງກ້າວເຂົ້າສູ່ການກະກຽມ ດຳເນີນກອງປະຊຸມໃຫຍ່ຜູ້ແທນສະມາຊິກພັກ ຄັ້ງທີ II ຂອງອົງຄະນະພັກກະຊວງ ແລະ ນຳພາຈັດຕັ້ງປະຕິບັດຕາມແຜນການ ປະຈຳປີ 2020 ຂອງບັນດາໜ່ວຍພັກ ໃຫ້ປະກົດຜົນເປັນຈິງ.